Babae si Satanas
Lumabas ako ng opisina kahapon at tumambad sa akin ang isang rally ng mga kababaihan. Syempre laban kay Ate Gloria. At syempre mapapahaba na naman ang lalakarin ko papuntang sakayan ng FX dahil sarado ang mga underpass sa Ayala. Makikinig sana ako sandali kaso dalawang buong pangungusap pa lang ang narinig ko natakot na ‘ko. Si Satanas daw ay babae, at nandun siya sa Malacanang. Nagulat ako kung bakit ganun sila magsalita sa harap ng maraming tao. Paano nila nalaman na si Satanas ‘yung nakaupo doon sa Palasyo? Hindi kaya dahil nanggaling din sila sa impyerno? Aba e mga kampon pala ng demonyo ang mga babaeng ito na nagra-rally sa Ayala! Umuwi na lang ako. Mabuti nang makapagpahinga ng maaga at may pasok pa bukas.
